الأسئلة الشائعة

كم تكلفة وكيل الذكاء الاصطناعي للأعمال في السعودية؟

خدمة العملاء عبر واتساب تبدأ من 149 ريال شهرياً، وباقة الأعمال مع الكول سنتر 1,099 ريال، وتحسين محركات الإجابة (GEO) 799 ريال، والباقة الشاملة 1,999 ريال. وفيه باقات مجانية تبدأ فيها، وخصم يوصل 20% على الاشتراك الأطول.

أنظمة الأتمتة المخصصة ما لها سعر ثابت — نحدده بعد جلسة تحديد النطاق، لأن الفرق بين نظام بسيط ونظام معقّد فرق كبير ما ينفع نخمّنه.

ليش اشتراك شهري مو دفعة وحدة؟

عشان ما تدفع مرتين. اللي يبيعك «مشروع» بمبلغ مقطوع، تكاليف التشغيل والتحسين والدعم تجيك بعده منفصلة. عندنا الاشتراك يشمل البناء والتشغيل والمتابعة والتحسين بمبلغ واحد تعرفه من أول شهر.

فيه تجربة مجانية؟

إي — تقدر تبدأ مجاناً: باقة مجانية لخدمة العملاء عبر واتساب، وباقة مجانية للكول سنتر. تسجّل وتجرّب وكيلك بنفسك من لوحة التحكم قبل ما تدفع ريال. وتحسين محركات الإجابة (GEO) ما له باقة مجانية.

أقدر ألغي الاشتراك أي وقت؟

إي، بلا مدة ارتباط. تلغي متى ما تبي بشرط تبلغنا قبلها بـ7 أيام على الأقل، ولو كنت دافع مقدماً نرجّع لك قيمة باقي المدة.

لو النظام ما ضبط معي، وش يصير؟

ابدأ بالباقة المجانية وجرّب قبل ما تدفع. ولو اشتركت وقررت تلغي، نرجّع لك قيمة باقي المدة بشرط تبلغنا قبلها بـ7 أيام على الأقل.

أقدر أجمع أكثر من خدمة بسعر أوفر؟

إي — عندنا باقتين تجمع الخدمات: باقة الأعمال (خدمة العملاء على الواتساب + الكول سنتر) بـ 1,099 ريال شهرياً، والباقة الشاملة (خدمة العملاء + الكول سنتر + تحسين محركات الإجابة GEO) بـ 1,999 ريال شهرياً. وخصم يوصل 20% على الاشتراك الأطول.

أقدر أقسّط الاشتراك؟

لا — ما فيه تقسيط حالياً. الدفع تحويل بنكي، مقدّماً بعد التجربة.

كم ياخذ تفعيل الوكيل عندكم؟

ساعات، مو أسابيع. نجهّز حسابك ونضبط وكيلك على بيانات نشاطك ويشتغل بنفس اليوم غالباً.

الاستثناء الوحيد أنظمة الأتمتة المخصصة — مدتها تتحدد بعد أول اجتماع، لأنها تختلف كلياً حسب تعقيد النظام وعدد الأنظمة المراد ربطها.

وش أحتاج عشان أبدأ معكم؟

سجل تجاري ساري، ورقم جوال ما يكون مربوطاً بحساب واتساب شغّال، ومعلومات نشاطك — خدماتك وأسعارك وأسئلة عملائك المتكررة. وإحنا نمشي الباقي كامل.

أقدر أستخدم رقمي الحالي؟

إي، بشرط ما يكون مربوطاً بحساب واتساب شغّال. لو مربوط، إما تحذف الحساب القديم أو تستخدم رقماً ثانياً — ونساعدك بالخيارين.

وش الأنظمة اللي تتكاملون معها؟

نتكامل مع المتاجر الإلكترونية مثل سلة وزد وشوبيفاي وووكومرس، وأنظمة إدارة العملاء مثل Zoho وOdoo وHubSpot، وأنظمة الفوترة مثل وافِق وقيود، وشركات الشحن مثل أوتو وطرود، وأنظمة المطاعم والعيادات.

ولو نظامك مو بالقائمة، نشوف طريقة نربطه بها — نقول لك من أول جلسة إذا كان ينربط ولا لا.

فيه حد أدنى لحجم الشركة؟

ما فيه. نشتغل مع المحل الصغير ومع الشركة الكبيرة — الشرط الوحيد سجل تجاري ساري.

وش الفرق بينكم وبين منصة أشترك فيها وأشغّلها بنفسي؟

المنصة تعطيك أدوات وإنت تشغّلها وتضبطها وتتابعها. إحنا نبني ونشغّل وندير ونحسّن — إنت ما تحتاج فريق تقني ولا تفتح لوحة تحكم إلا لو حبيت تشوف النتائج.

أنا عندي نظام قديم، تقدرون تربطون عليه؟

غالباً إي. نربط أنظمة جديدة وقديمة ومبنية داخلياً. ولو طلبك ما ينبني، نقول لك من أول جلسة — مو بعد ما تدفع.

وش الفرق بين واتساب بيزنس العادي وواتساب API الرسمي؟

واتساب بيزنس تطبيق تنزّله على جوال واحد وترد منه يدوياً — مناسب للمحل الصغير جداً.

واتساب API الرسمي نظام يربط رقمك بأنظمتك، يخلي أكثر من موظف يرد من نفس الرقم، ويشغّل وكيل ذكاء اصطناعي يرد تلقائياً — وهذا اللي نشتغل عليه.

هل أقدر أفعّل واتساب API بدون سجل تجاري؟

لا. السجل التجاري السعودي الساري شرط إلزامي من ميتا، ولازم يطابق الاسم التجاري المستخدم بالحساب. لو عملك حر، تحتاج تستخرج سجلاً أول.

الحساب راح يكون باسمي ولا باسمكم؟

باسمك أنت من أول يوم. حساب واتساب الأعمال ملك شركتك، وإحنا ناخذ صلاحية إدارة فقط. لو انفصلنا يوم، الحساب يبقى عندك ما يروح معنا.

هل فيه خطر يتحظر رقمي؟

الخطر يجي من استخدام التطبيق العادي بالإرسال الجماعي أو مخالفة سياسات ميتا. إحنا نشتغل على واجهة ميتا الرسمية بقوالب معتمدة، ونضبط وكيلك محصوراً بنشاطك — وهذا اللي يحمي رقمك.

ليه الوكيل ما يجاوب على أي سؤال خارج نشاطي؟

لأن سياسة واتساب من يناير 2026 تمنع المساعدين العامّين وتجيز الوكلاء المحصورين بنشاط تجاري محدد. حصر النطاق حماية لحسابك لا تقصير منّا.

تحتاجون العلامة الزرقاء عشان يشتغل؟

لا. العلامة الزرقاء اختيارية وما تأثر على عمل الرسائل. اللي يهم فعلاً هو توثيق حساب الأعمال — وهذا اللي يرفع حدود الإرسال ويخلي اسم نشاطك يظهر بدل الرقم.

كيف يشتغل الكول سنتر بالذكاء الاصطناعي؟

وكيل صوتي يرد على مكالمات شركتك بصوت طبيعي — يفهم طلب المتصل بكلامه العادي بلا قوائم ولا «اضغط 1»، يحجز أو يجاوب أو يحوّل للموظف المناسب، ويوصلك ملخّص مكتوب لكل مكالمة.

الرقم راح يكون باسم مين؟

باسم شركتك. الاشتراك مع مزوّد اتصالات مرخّص من هيئة الاتصالات، والعقد باسمك أنت — إحنا نجهّز ونربط وندير طبقة الذكاء فوقه.

أقدر أستخدم رقمي الموحد 9200 الحالي؟

إي — لو عندك 9200 شغّال نربطه ويشتغل. تجيب رقمك (9200 أو أرضي أو مجاني) وتدفع فاتورته لمزوّدك، وإحنا نربطه بالوكيل ونشغّله.

تخدمون خارج السعودية؟

واتساب والأتمتة توصل لأي مكان بالعالم. الكول سنتر الصوتي داخل السعودية فقط، لأنه مبني فوق مزوّد اتصالات مرخّص سعودياً وأرقام 9200 سعودية.

كيف أعرف إن الاشتراك يستاهل؟

احسبها بنفسك: كم مكالمة أو رسالة تفوتك بالشهر، وكم يسوى لك العميل الواحد. الوكيل يشتغل على مدار الساعة بتكلفة ثابتة تعرفها من أول شهر بلا مفاجآت.

وما تحتاج تخمّن — من أول شهر تشوف بلوحتك كم محادثة وصلت، وكم منها صارت حجزاً أو طلباً.

هل أقدر أستغني عن موظف خدمة العملاء؟

ما ننصح بذلك، وما نبيعك إياه. الوكيل يمسك المتكرر — المواعيد والأسعار و«وين طلبي» — ويفضّي موظفك للحالات اللي تحتاج بشرياً فعلاً. النتيجة موظف أنتج، مو موظف أقل.

الوكيل يتكلم بأي لغة؟

عربي، وباللهجة اللي تختارها لعملائك — مو ترجمة آلية. ولو تبي لغات إضافية نضبطها لك، وتنعكس على تكلفة الباقة.

وين تنحفظ بيانات عملائي؟

على سيرفر خاص بمُجاب AI، مؤمّن ومشفّر، وبيانات كل عميل معزولة تماماً عن غيره.

بياناتي تُستخدم لتدريب الذكاء الاصطناعي؟

لا. ولا محادثة من محادثات عملائك تدخل تدريب أي نموذج. بياناتك بياناتك، وتقدر تطلبها وتخرج بها متى ما بغيت.

لو صارت مشكلة بالليل، ألقى أحد؟

إي. وكيل ذكاء اصطناعي يستقبل بلاغك على مدار الساعة، ورقم مخصص عليه أشخاص حقيقيون 24 ساعة للمشاكل اللي تحتاج تدخّلاً بشرياً.

مين مُجاب AI؟

مُجاب AI وكالة سعودية مقرّها الرياض، اسمها النظامي شركة السحابة الذكية ل لاتصالات و تقنية المعلومات شركة شخص واحد، متخصصة ببناء وتشغيل وكلاء الذكاء الاصطناعي وأنظمة الأتمتة للشركات في السعودية عبر تسعة قطاعات.

ليش أختاركم وفيه شركات أكبر؟

لثلاثة أسباب نقولها بصراحة: الأكبر يبيعك أداة وتشغّلها بنفسك، وإحنا نشغّلها عنك بالكامل. وإحنا سعوديون نبني بلهجة عميلك ونعرف سوقك. وحسابك باسمك من أول يوم — تقدر تمشي متى ما بغيت، وهذا يخلينا نشتغل عشان تبقى مو عشان ما تقدر تطلع.

وش الأشياء اللي ما تسوّونها؟

نقولها بصراحة عشان تعرف وش تتوقع:

ما نبيعك أداة وتدبّر راسك. نبني ونشغّل وندير، والحساب باسمك من أول يوم.

ما نصير مزوّد اتصالات ولا بوابة دفع. رقمك من مزوّد مرخّص وباسمك، وبوابة الدفع من جهة مرخّصة — والتراخيص تبقى عند أهلها وهذا بمصلحتك.

ما نضمن أرقاماً. ما نقول لك «بنزيد مبيعاتك 40٪»، ما أحد يقدر يضمنها بصدق. اللي نلتزم فيه بالعقد: الوكيل يشتغل ويرد ويحوّل للبشري بمستوى أداء مكتوب بالعقد.

ما نلغي فريقك. الوكيل يمسك المتكرر، والتحويل للموظف موجود دايماً.

ما نشتغل مع كل نشاط. فيه أنشطة تمنعها سياسات ميتا وبوابات الدفع، ونقول لك من أول مكالمة بدل ما نضيّع وقتك ووقتنا.

ليه ما فيه سعر معلن لأنظمة الأتمتة المخصصة؟

لأن ما فيه معيار يجمع بين شركة تبي نظاماً بسيطاً وشركة تبي منظومة كاملة. أي جهة تعطيك سعر نظام مخصص قبل ما تفهم عملياتك، إما تخمّن أو بترجع تزيد عليك بعدين. نقعد معك جلسة تحديد نطاق، وبعدها تعرف رقمك بالضبط.

بعد ما يشتغل النظام، تختفون؟

لا. الاشتراك يشمل التشغيل والمتابعة والتحسين المستمر — نراقب النظام ونتدخّل قبل لا توصلك المشكلة، ونطوّره شهرياً على بياناتك الفعلية.